މިއީ، ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 8 ވަނަ ބާބުގައި ކަނޑައަޅާފައިވާ އަދި ޖަދުވަލު 2 ގައި ބުނެފައިވާ އިދާރީ ދާއިރާތައް ލާމަރުކަޒީ އުސޫލުން ހިންގުމަށް މަގުފަހިކުރުމުގެ ގޮތުން ހަމަޖައްސަންޖެހޭ އިންތިޒާމްތައް ހަމަޖެއްސުމަށާއި ސަރަޙައްދީ ތަރައްޤީ ޙާޞިލްކުރުމަށް ހިންގޭ ޤައުމީ މަޝްރޫޢެކެވެ. ޤައުމީ މިމަޝްރޫޢު ހިންގޭނީ މިކަރުދާހުގައިވާ ގޮތުގެމަތިންނެވެ. މި ނިޒާމުގެ ދަށުން އިދާރީ ދާއިރާތައް ބިނާވެފައިވަނީ މައިސަރުކާރު، ޕްރޮވިންސް، އަދި ރަށް ހިމެނޭ ތިން ދަރަޖައެއްގެ މައްޗަށެވެ.

މައިސަރުކާރުގެ ދައުރުކުޑަވެ ޚާރިޖީއާއި ދިފާޢީ ކަންތައްތަކާއި އަދި ސިވިލްއޭވިއޭޝަން ފިޔަވައި ހުރިހާދާއިރާތަކެއްގެ މައިގަނޑު ސިޔާސަތު ހެދުމާއި ފަންނީ މައިގަނޑު ލަފާދިނުން ނޫން ހުރިހާކަމެއް ޕްރޮވިންސް ފެންވަރަށް ދޫކޮށްލެވޭނެއެވެ. ޔުނިޓަރީ ދައުލަތެއްގެ ގޮތުގައި ދިވެހި ރާއްޖެއޮވެ ޤާނޫނުއަސާސީއާ ޚިލާފްނުވާގޮތަށް ތަރައްޤީ ޙާޞިލްކުރުމަށްޓަކައި މިއިންތިޒާމްތަކުގެ ދަށުން ވީހާވެސް ގިނަބާރުތަކެއް ޕްރޮވިންސްތަކަށް ދެވޭނެއެވެ. ސަރަޙައްދީ މި ނިޒާމު ހިންގުމަށްޓަކައި މިހާރު ހަމަޖައްސާ ވަގުތީ އިންތިޒާމްގެ ދަށުން އަތޮޅުއޮފީހުގެ ދައުރުކުޑަވެ ޕްރޮވިންސް ހިންގުމުގެ ނިޒާމާއި ބާރު ބިނާވެފައިވާނީ ޕްރޮވިންސް އޮފީހާއި ރަށުއޮފީހުގެ މައްޗަށެވެ. ނަމަވެސް އަތޮޅުފެންވަރުގައި ހިންގާ ތަރައްޤީގެ ކަންތައްތައް ބަލައި ވަޒަންކުރުމުގެ ދައުރެއް އަތޮޅުއޮފީސްތަކަށް އޮންނާނެއެވެ. ޕްރޮވިންސް ފެންވަރުގައި އެންމެބޮޑު އަހައްމިއްޔަތެއް ދޭނީ ސަރުކާރުން ނިންމަންޖެހޭ ނިންމުންތައް ލާމަރުކަޒީ އުސޫލުން ނިންމުމާއި ޕްރޮވިންސްގައި ދިރިއުޅޭ މީހުން މާލެނައިސް އެމީހުން އެދިރިއުޅޭ ހިސާބަކުން ދިރިއުޅުމުގެ ގިނަ ބޭނުންތައް ފުއްދޭ ފެންވަރަށް އެޕްރޮވިންސްތައް ތަރައްޤީކޮށް ހިންގުމަށެވެ. އަތޮޅުއޮފީހުގެ ދައުރަކީ އެއޮފީހެއް ހިމެނޭ އަތޮޅެއްގެ އަތޮޅު ފެންވަރުގައި ހިންގޭ ތަރައްޤީގެ މަޝްރޫޢުތައް ބަލައި ވަޒަން ކުރުމާއި ރަށްރަށުގައި ޖަމާޢަތުގެ ފެންވަރުގައި ނިންމޭ މަޝްރޫޢުތަކާމެދު އެންމެފަހުގެ ނިންމުން ނިންމުމާއި ސަރުކާރުން ހަދާފައިވާ ޤަވާޢިދުތަކާ އެއްގޮތައް ރަށުއޮފީސްތައް ހިންގުމަށް ބާރުއެޅުމެވެ. ރަށު އޮފީހުގެ ދައުރަކީ ރަށުފެންވަރުގައި ރައްޔިތުންނަށް ދޭންޖެހޭ ޚިދުމަތްތައް ދީ ރަށުފެންވަރުގައި ހިންގަންޖެހޭ ޖަމާޢަތު ފެންވަރުގެ މަޝްރޫޢުތައް ރާވައި ހިންގުމާއި މުނިސިޕަލް ޚިދްމަތްތައް ދިނުމާއި ޕްރޮވިންސް ފެންވަރުގައި ހިންގޭ މަޝްރޫޢުތަކަށް ރައްޔިތުންގެ ޚިޔާލު ފޯރުކޮށްދިނުމެވެ. މި ވަގުތީ އިންތިޒާމުތައް ދެމިއޮންނާނީ ލާމަރުކަޒީ އުސޫލުން އިދާރީ ދާއިރާތައް ހިންގުމާބެހޭ ޤާނޫނު ފާސްވެ އެތެރޭގެ އިންތިޚާބުތައް ބާއްވާ ނިމެންދެންނެވެ.